Catuttha Anudhamma Suttaṃ
Saɱyutta Nikāya:
III. Khandhā Vagga:
22: Khandhāsaɱyutta
Sutta 42
Catuttha Anudhamma Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1975 Pali Text Society Saŋyutta-Nikaya, edited by M. Leon Feer
[1-2][ati] Sāvatthiyaṃ:|| ||
[3] Dhammānudhammapaṭipannassa bhikkhave, bhikkhuno ayamanudhammo hoti:|| ||
Yaṃ rūpe anattānupassī vihareyya,||
vedanāya anattānupassī vihareyya,||
saññaṃ anattānupassī vihareyya,||
saŋkhāre anattānupassī vihareyya,||
viññāṇaṃ anattānupassī vihareyya.|| ||
[4] So rūpe anattānupassī viharanto||
vedanāya anattānupassī viharanto||
saññāya anattānupassī viharanto||
saŋkhāresu anattānupassī viharanto||
viññāṇe anattānupassī viharanto,||
rūpaṃ parijānāti||
vedanaṃ parijānāti||
saññaṃ parijānāti||
saŋkhāre parijānāti||
viññāṇaṃ parijānāti.|| ||
[5] So rūpaṃ parijānaṃ||
vedanaṃ parijānaṃ||
saññaṃ parijānaṃ||
saŋkhāre parijānaṃ||
viññāṇaṃ parijānaṃ||
parimuccati rūpamhā,||
parimuccati vedanāya,||
parimuccati saññāya,||
parimuccati saŋkhārehi,||
parimuccati viññāṇamhā,||
parimuccati jātiyā jarāya maraṇena sokehi paridevehi dukkhehi domanassehi upāyāsehi,||
parimuccati dukkhasmāti vadāmīti.|| ||
