Tatiya Atītanāgata Suttaṃ (3)

Saɱyutta Nikāya:
III. Khandhā Vagga:
22: Khandhāsaɱyutta
Sutta 11
Tatiya Atītanāgata Suttaṃ (3)

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1975 Pali Text Society Saŋyutta-Nikaya, edited by M. Leon Feer

[1] Sāvatthiniyaṃ-|| ||

Rūpaṃ bhikkhave,||
anattā atītānāgataṃ,||
ko pana vādo paccuppannassa.|| ||

Evaṃ passaṃ bhikkhave,||
Sutavā ariyasāvako atītasmiṃ rūpasmiṃ anapekho hoti,||
anāgataṃ rūpaṃ nābhinandati,||
paccuppannassa rūpassa nibbidāya virāgāya nirodhāya paṭipanno hoti.|| ||

Vedanā anattā atītānāgataṃ,||
ko pana vādo paccuppannassa.|| ||

Evaṃ Passaṃ bhikkhave,||
Sutavā ariyasāvako atītasmiṃ vedanasmiṃ anapekho hoti,||
anāgataṃ vedanaṃ nābhinandati,||
paccuppannassa vedanassa nibbidāya virāgāya nirodhāya paṭipanno hoti.|| ||

Saññā anattā atītānāgataṃ,||
ko pana vādo paccuppannassa.|| ||

Evaṃ passaṃ bhikkhave,||
Sutavā ariyasāvako atītasmiṃ saññasmiṃ anapekho hoti,||
anāgataṃ saññaṃ nābhinandati,||
paccuppannassa saññassa nibbidāya virāgāya nirodhāya paṭipanno hoti.|| ||

Saṃkhārā anattā atītānāgataṃ,||
ko pana vādo paccuppannassa.|| ||

Evaṃ passaṃ bhikkhave,||
Sutavā ariyasāvako atītasmiṃ saŋkhārasmiṃ anapekho hoti,||
anāgataṃ saŋkhāraṃ nābhinandati,||
paccuppannassa saŋkhārassa nibbidāya virāgāya nirodhāya paṭipanno hoti.|| ||

Viññāṇaṃ anattaṃ atītānāgataṃ,||
ko pana vādo paccuppannassa.|| ||

Evaṃ passaṃ bhikkhave,||
Sutavā ariyasāvako atītasmiṃ viññāṇasmiṃ anapekho hoti,||
anāgataṃ viññāṇaṃ nābhinandati,||
paccuppannassa viññāṇassa nibbidāya virāgāya nirodhāya paṭipanno hotī ti.|| ||

Nakulapituvaggo paṭhamo

Source

obo.genaud.net